Foto Keluarga, Nyimpen Kenangan, Nuduhake Keturunan

Foto kulawarga wis dadi barang kang lumrah. Prasasat ing meh saben omah mesthi ana foto kulawarga ing tembok. Yen ora ruwang tamu, ya ing ruwang kulawarga. Utawa malah ing ruwang makan. Yen ing ruwang makan, saperangan malah ana kang nemplekake sakehing foto. Wiwit isih jaman pacaran, foto rikala dadi manten, banjur foto anak saka lair ceprol nganti ngacik diwasa.

Kejaba kanggo sawangan, foto kulawarga mono sakjane akeh mupa­ngate. Kang kapisan, kaya adate foto, kena kanggo kenang-kenangan. Nalika ana kadadeyan spesial, kaya ta ulang taun, foto bebarengan nalika anak menang lomba, uga rikala salah sawijining anggota kulawarga wini­suda.

Foto kulawarga uga bisa dirancang kanggo nglumpukake brayat. Kula­warga inti bae, sok ana salah siji utawa saperangan anggotane kang ngudi kawruh utawa makarya ana kutha liya. Mula bisa dirancang sawijining dina kanggo sapatemon lan foto bebarengan. Banjur sowang-sowang padha nggawa asile foto. Yen kangen bisa nguwasakake asil cetak kasebut. Bisa uga banjur tuwuh pepenginan ngepasake wektu kanggo nglumpuk maneh.

Bab iki bakal luwih temanja nalika kang ana ing foto pirang-pirang kulawarga, utawa kulawarga ageng. Saka bocah-bocah nganti simbah-simbah, kabeh kang isih sugeng dipacak bareng ana salembar foto. Bisa dijingglengi, si anu isih gundhul, si kae wis gedhe dhuwur, bu lik kene jian ayu tenan sanajan tanpa wedhak pupur, mbah kana rikmane wis ora thukul, lsp.

Foto kulawarga ageng iki uga bisa kanggo nuduhake garis keturunan. Mligine kanggo para anak. Kanthi ngematake paraga ing foto bisa mangerteni sapa sedulure saka bapak lan ibu, sapa simbah lan simbah buyute. Utamane kang misah adoh papan dununge lan arang kepethuk, bisa niteni kaya ngapa praenane. Yen kepethuk ing ndalan mbokmenawa ora pangling.

Anggota kulawarga kang isih cilik utawa malah bayi, ngenalake silsilah kulawarga uga banget pentinge. Yen tekan wayahe kepethuk brayat kang adoh papan dununge, ora banget anggone kaget utawa kaku. Bisa enggal sapa aruh kanthi grapyak.

Witing tresna jalaran saka kulina. Kepriye anggone bakal tresna yen ora kulina kepethuk lan srawung? Ya kanthi foto iku bisa dadi sranane. Upamane, saben kulawarga inti padha nggawe foto kulawarga. Banjur padha kirim-kiriman marang sedulur liyane. Ing dalem, diwenehi pigura banjur dipasang ana tembok. Yen kober, bisa diurutake saka sedulur kang paling tuwa. Mula, mulangake silsilah kulawarga, sanadyan pinisah papan kang adoh, dudu bab kang angel lan mokal.